عـن أمارتا


أمارتا هيي مكان قديم جديد.. مكان جمعنا لنحب بعض من جديد..


انا وانت والمسا ..شاي أو قهوة أو متة.. وأمارتا..


أمارتا هيي شجرتنا.. رح نتفيّى بظلالها.. ورح نقعد كلنا جنب بعض باختلاف آرائنا وتعارض أفكارنا وتجاربنا..
أمارتا رح تشدنا لعندها وتضّمنا لنقدر نشوف عالمنا الضعيف المكسور بعيون أكتر عقلانية وبقامة أكتر كرامة وبروح أكتر حريّة


امارتا بلشت ع الفيس بوك برسالة جمعتنا... امارتا نتيجة لجهد جماعي مو شخص او شخصين عملوها.. ورح تضلها ممنونة لهدول الناس طالما هيي هون..
هدول الناس قررو انو تكون امارتا شي مختلف.. تجربة أصيلة وحقيقية....
بنشكر كل الاشخاص اللي اشتغلو معنا بالتأسيس ..
قصي ناي مازن صوفي جودي زيد لما ريتا جدل


أمارتا ..خلال الفترة الماضية ..حاولت تكريس روح المحبة اللي بتجمع اعضائها .. بعيداً عن أي تعصّب أو تطرّف لفكرة أو اتجاه واحد . 
الطريق صعب ...وملئ بالمشاكل ...لكن بمثابرة القيّمين و صبر الاعضاء و اخلاصون ..قدرنا نتخطّى اغلب العقبات و نتجاوزها


أمارتا مالها ملك أحد ...أمارتا هي إلنا ...فينا رح تبقى صبية نضرة .


طريقنا لسّا بأولو ...امارتا بدها شغل كتير و اصرار أكبر ...
من الاول ..ومن خلال سعينا لتطبيق روح الجماعة و العمل المشترك ...وضعنا اسس و قواعد العمل بالمنتدى و طريقة التناوب على الادارة و المساهمة ببناء المنتدى بجهود الكل ..ورح يثمر هالجهد عن تنظيم أول انتخابات ادارية ..اللي شفناها ...اكتر الطرق فاعلية لاشراك الكل بعملية بناء الموقع و المشاركة فيه


خطوط السياسة العامّة للمنتدى قامت على اساس انو نحن , شباب واعي مثقّف مختلف الاتجاهات و الانتمائات و الاعراق , نحاول نلاقي القواسم المشتركة بيناتنا ...وننمّي و نظهر الاشيا اللي بتجمعنا , ونبتعد عن الاشيا اللي بتفرقنا ...
انا مسيحي و انته مسلم وهاي يسارية و هداك يميني ...لكن اللي بيجمعنا هو أكبر من أكبر شي , المحبّة و الصداقة , ما بيهمني منو انته ومنين جاية ..المهم عندي انو فينك تقبلني و تتقبل وجودي و حقوقي 
بنبعد عن الدين و الطائفية و الفتن و التفرقة ..بتجتمع على محبتنا للحياة و الجمال و الفن و الثقافة ...


نحن بنعيش بمجتمعات متخلّفة , و اغلب البشر لازمها اعادة تأهيل و بناء , بدنا نحاول , مابوسعنا , نفكّر بأليات و حلول ...صرلنا سنين و ايام عمنقرا و بنسمع و بنشوف أزماتنا و امراضنا ,بيكفينا تشخيص و وصف و تمحيص , الكل صار يعرف شو الامراض اللي بتعاني منها مجتمعاتنا , واجا الوقت اللي نوجد حلول و اليات للخروج من عنق الزجاجة , و اطلاق الطاقات لاشيا مفيدة بدل تبديد الطاقات و اشغال العقول باشيا لا طائل من مناقشتها و تفنيدها ..


هدفنا انو نعمل أمارتا محطة حياة متكاملة , من كل نواحي و جوانب الحياة الواقعية اللي بنعيشها , من السياسة ...للمجتمع... للترفيه والمرح , الكل يحسّ انو عمبيستفيد من هالكم ساعة اللي بيتواجد فيهون على الشبكة ..سواءً كان بمعلومة , بقصّة , بموقف مرح..


نحن هون , بامارتا , بنبتعد جداً عن الشخصيات و منرّكز عالافكار ..حاولنا , ورح نحاول دايماً , نبتعد عن النمطيّة و التكرار 
كل المواد عندنا بالمجان ..ماحدا مضطر يكتب رد ليحمّل شي .. ضيوفنا فيهون يستفيدو من كل المواد الموجودة بدون تسجيل ..
عمنحاول نقدّم المادّة الجيدة , نبتعد السخافات و الهراء , نعتمد عالكيف وعالنوعية , مو مهم ابداً انو الموضوع ماتمّ الرَدّ عليه , المهم جداً انو كم شخص استفاد من المعلومات المطروحة ..
كل واحد فينا ملزم انو يعطي احسن ماعندو و بيقدم اللي بيقدر عليه ...


-------------
بتمنى للكل قضاء وقت مفيد و ممتع في بيتكون


فيك تزورنا /من هون/

هناك ١٦ تعليقًا:

  1. غريب ليش مو كاتبين انكون عملاء وخونة وكلاب المعارضة مارح نكتفي هيك وكل مافتحتو هالمنتدى العميل الخاين رح نهكرو ومالرح نهدى ونسكت لنشوفكون انتو وبندر وسعد الحريري بالسجن ياخونة
    مو أنا بينحذفو مواضيعي وردودي مع تحيات
    Il Padrino

    ردحذف
  2. مينو الاخ ؟؟؟؟؟؟؟؟؟؟؟؟

    ردحذف
  3. انت قليل عليك حذف مواضيعك بالاساس شوعندك حتى تكتب مواضيع ؟؟؟؟؟؟؟؟ يلي مو قادر يسمع الاخر مومنحقو يكتب مواضيع
    مع تحيات محسن

    ردحذف
  4. المنتدى ما اتهكر و هي كزبة من اصحابو مشان يعملو ضجة ............ شلة كزابين منافقين و خونة و متعاملين و على راسهن الايهم

    مع تحيات سيران سير

    ردحذف
  5. معلومات اول مرة اقرأها شكرا لك

    ردحذف
  6. للاسف تدمير سوريا يجري بدون هواده ولاتوقف

    ردحذف
  7. اقترب الوعد الحق يا سوريا صبرا




    الحب

    ردحذف
  8. اما ان يا بشار ان توقف الة القتل

    ردحذف
  9. تحيه لأبطال سوريا الصامدين

    ردحذف
  10. صبرا سوريا فالنصر قادم لامحاله

    ردحذف
  11. هذا ثمن الحريه.صبرا اخواننا في سوريا

    ردحذف
  12. ومازال حمام الدم دون توقف!!!!

    ردحذف
  13. الله معكم يا شعب سوريا
    كرستاله الذهبيه

    ردحذف