١٢ تشرين الأول، ٢٠١٠

سياحتك باستانبول.. من الألف الى الياء

انعرفت تركيا كبلد استقطاب للسياحة العربية بالفترة الاخيرة ..
رح احكي هون عن استانبول بشكل خاص... كلشي عن استانبول... أماكن السياحو .. صور.. الناس .. الاكل والشرب.. وكلشي بتحتاجو لتروح عليها..

فهرس الموضوع


طرق الذهاب لاستانبول
الفنادق
التنقل داخل استانبول
الأكبيل وسيلة تخفيض لوسائل النقل العامة


جزر الاميرات
جولة في البوسفور
آيا صوفيا
جامع السلطان احمد







لحتى تروح ع استانبول بدون كروب سياحي فيك تستخدم كذا طريق..
1- بتركب من دمشق لانطاكية بولمان بيكلف بين 350 الى 500 ليرةسورية بيطلع السعة 10 ونص من دمشق وبيوصل دايما الساعة 4 الصبح
وبعدين بتركب بولمان تاني من أنطاكية بيطلع الساعة 12 الضهر دايما وبتستمر الرحلة 17 ساعة تكلفة قدرها 1000 ل 1500 ليرة أحسن شركة ممكن تختارها هي شركة "هاس"


2- فيك تركب بولمان على انطاكية ومن انطاكية بتركب طيارة ع استانبول في شركات صغيرة ورخيصة "شركة الطيران التركية وهيي الاغلى ووالاكثر راحة" "بيكاسوس" رخيصة كتير ومعقولة... والملفت للنظر انو الحجز بشركات الطيران الداخلي التركي بيكون أرخص كل ما حجزت بوقت أبكر... يعني فيك تأمن رحلة من انطاكية على استانبول بسعر 2000 ليرة سورية اذا حجزت قبل شهر بينما ممكن يوصل السعر على نفس الرحلة ل 5000 ليرة اذا حجزت قبل بيوم... التاكسي من كراج البولمان على مطار أنطاكية بيكلف 900 ليرة سوري


3- فيك كمان تروح على عنتاب اذا كنت طالع من حلب مثلا... التاكسي من حلب على عنتاب ب2500 ليرة للتاكسي كلو سواء كان راكب فيه 4 اشخاص او شخص واحد ومن هونيك فيك تركب طيارة على استانبول


4- وفيك تركب طيارة من دمشق دغري على استانبول... شركة أجنحة الشام بتقدم عروض رخيصة بس الخدمة سيئة كتير والطيارة ممكن تتأخر 4 الى 5 ساعات بتكلف السفرة عى اجنحة الشام تقريبا 15 الف ذهاب اياب بوقت الذروة... بينما على التركية ممكن يصل الحجز ل 35 الف ذهاب اياب كمان وقت ذروة الموسم
الفنادق


هادا موقع للاطلاع على أفضل عروض الاوتيلات باستانبول من هون


عادة الأفضل أنو يحجز الواحد من سوريا اوتيل... ما يروح ويحجز هونيك لانو بتفرق بالسعر... المكتب بيأمن سعر أفضل دايما... الاسعار بتبدا ب 20 دولار وبتعلى ل 200 دولار تقريبا ...


لما بدك تحجز فيك تطلب انو تشوف موقع الاوتيل على الغوغل وفي منطقتين هنن الافضل الاولى هيي منطقة السوق المسكر "امين أونو" "السلطان أحمد" وحواليه او منطقة تانية وهيي شارع "التقسيم" ... بتوقع غير هدول المناطق ما رح يكون منيح...
التنقل


التاكسي باستانبول غالي كتير... يعني ممكن يكلفك مشوار صغير 500 ليرة سوري...


الوسيلة الأفضل للتنقل هيي الترام واي يلي بيقطع كل الناطق المهمة باستانبول.. واللي بتقدر تركب فيه وتعمل تور باستانبول ...
وسائل النقل كتير واضحة وما بتحتاج تسأل حدا... خاصة اذا معك خريطة أو كان موبايلك بيدعم خدمة الGprs كتير بترتاح وبتعرفوين مكانك بالضبط .. وبيطلع عندك صور الشوارع واتجاهاتون وخط توجهك .. خطوط الباات والميترو والترامواي واهم المناطق السياحية والاوتيلات والمرافئ والبنوك ..


وبس تكون نازل بأوتيل يشارع التقسيم أو جادة الاستقلال أو منطقة السلطان احمد او السوق المسكر والأمين اونو فأنت غالبا رح تتنقل مشي...


لازم تشتري بطاقة اسمها "أكبيل" وهيي عبارة عن قطعة معدنية ممغنطة بتنشحن مقابل دفع مبلغ مادي... وكل ما بتفضا بترجع بتشحنها.. فيك تستعملها لتركب باص او ميترو او تلفريك او سفينة او حتى تفوت لبعض المتاحف وبيكون لمستعملها تخفيض منيح كتير ...
الأماكن السياحية في استانبولرح نحكي هون عن الاماكن اللي ممكن يزورها الواحد باستانبول طريقة الذهاب .. والاسعار ونصايح من هون وهون..


البوسفور...


مضيق البوسفور هوي من أجمل المضائق بالعالم بيوصل بين البحر الاسود بحر مرمرة ... فيك تروح بجولة بالبوسفور عن طريق ميناء "أمين أونو" وهوي ميناء مشهور كتير.. الرحلة بتستغرق ساعتين .. الوسيلة هيي سفينة على الطراز القديم بفرش خشبي من جوا فيها قسم مقتوح ومقاعد بالهواء الطلق وقسم مسكر فيو شبابيك لحتى تشوف المناظر وفي بالسفينة عصير وشاي ومعجنات وصندويش بأسعار عادية كتير .. في كمان عبارات حديثة الطراز مغلقة مزودة بشبابيك على الاطراف وأسرع من العبارات التقليدية وبتشبه شكل الطيارة من جوا.. والتنين نفس السعر... الرحلة بالسفينة بتكلف 8 ليرات تركي يعني 250 ليرة سوري تقريبا فيك تدفع عن طريق الأكبيل اللي حكينا عنها فوق والأطفال ببلاش ..
الوقت الأفضل للجولة هوي المسا قبل الغروب ...


فيك كمان تستأجر يخت من نفس ميناء الأونو.. بيكلف بالساعة 100 ليرة تركي يعني 3000 ليرة سوري وتبقى بالبحر الوقت اللي بدك ياه...


خليكون معنا كملو الرحلة مع nay

ليست هناك تعليقات:

إرسال تعليق